A Sweet Love Story

Hausienmuan Munluo.

Lhingboi na theikha ei? Chi'n ka meltheipa kung ah kakan hi. A khuo uh kou khuo Singngat toh ki galsaihi. Lhingboi maisua kamulou na kum 9 valta. Ama Lhingboi kei theichiang tan in a melhoi a, khotaga hi uhi. Kasah a tuitoi nupi nu'n; Koi Lhingboi e? Chi'n hing dong a, Kagei a papi pan theikhalou ahidan hing gen hi. Lhingboi mel telawmnou kamu tawpna, a innmaikem ua nui singseng kawm a mangpha ahing ha ahi.

Tuani khu June 16, 1999 in kathei. Ka khuouh Singngat ah meitei helte khosa ua, hunchin teng in a camp uh Hiangtam khonou ah khosung tangval ten sum law in a supply ding uh vaki puopia hi. Sumzah ding deina ziah a tuaniKa loipa Lianboi toh Hiangtam khonou phakha kahi uhi. Singngat zuan a kahing kilekia uh Likhai gammang kapha un gingtat loupi'n huipi leh guapi hingzu a, nai kal 5 val ann nehlou leh khawllou a lamzawt kahi ziah un kei gilkial in lamkal ah basam in ka puohhi. Ka loipa Lianboi in kaban ah hingkai in malam kahing zawt zel uhi. Khomunom khuo kapha na ding uh Km 1 vel um in, guanuai gammang lai ah gimsia in hawtui lah ah ka lumsuh a, Lianboi inlah kei puah na ding in tha neinonlou in kagei ah tou in hing maw et maihi. Nehding umlou, ka gil kial deudeu, tuisiang dawn ding umlou ka dangta deudeu in kagim se deudeu hi. Tamkhu basam ahi. Chimawh beidong a ka umlai in ka thuum (pray) teisam a, hinanleh kathuumna ka gingta sih hi. Si ding a kaki ngaituah lai in Lhingboi leh a naupa lou apat hing peite'n hingpha tou ua, Lianboi in zong na houpi pai in, Lhingboi in zong bangma itt lou in atuisiangte hingpia in, atheiga puote hing nesah pai hi. Lianboi toh a uta un a Inn chiang hing buaipi uhi.

Kei zong katha umnonlou ahi ziah in Lhingboite tounazawn ah ka lumsuh a, aman tapkuo a meite hing chih in, tuilumte leh singpite hing dawn sah in, ka sa tungte tuilum toh hingmeh hi. Meipang ah kapuante hing hanggaw piah in, ama puanlumte hing silsah hi. Ka mel athei ngeilou hinanleh a sanggampa bang in hing zenhi. Naikal khatvel ka tawldam nua, kahing hal in kou zong Singngat zuan din'n ka hing dingkhia ua, kei zong kipah seng kahiman in ka sum neisun Rs.100 Lhingboi kapiahi. hinanleh aman la ut lou in; " Kimelthei ei a ding a phazaw/hoizaw hilou e" chi'n hing gen in, nui sing seng kawm in a innkem ua mangpha hingha hi.

Tuani apat kum 9 zou ka loipa'n Lhingboi te Christmass mang di'n hing tung uh achi ziah a tuani va kan kha kahi. Kasah a nupi tuitoinu'n hing zui in chi'n hing gen a, a inn uh ka tung in na U Lhingboi a pawt e? Chi'n innmai kem a um tangvalpa kung ah kanhi. Window apat in Lhingboi hingda khia hi,hinanleh a mel saiha bang in daang a, amai ah daana in a suai na namkip hi.Lhingboi in pasal nei a, tapa khat neita ahidan te hing gen hi.

Tuazan tung solhapi ahing suatah in, tam Lhingboi leh ka tungthu uh laa in kasa a, tuanitah in ka tangthute uh van a Ahsi te kahil hi. Asam Hycinth paa bang in vom a, amute rose pah bang in san hi. nidang in Lhingboi itt na theisiam hileng tuzan in ama ka ang ah ka pom ding a, ama'n ka liang ah a lu nga in, a khut kei a sung ah katu ding a, Hapi sakol kangtarai dangka eng a taite ka etpi dinghi. hinanleh a ittna katheisiam lou zia in kei ka ngen in ka tou a, ka ittpen in ahing na pei liamsan maihi. " Tamnah itt tu dihtah um eh" chi'n ka lawmpan genkhia hi. Ittna khu thil lamdang tah ahi. Suangmantam sang a manpha zaw, sum leh sana in a leizoulou, Bazar ah kizua ngeilou a, summet bawlte kung a lei ahilou ban ah, sel ate a Ruby a leivual ding zong hilou hi. Ka Innveng pa'n kadaana thugu theisiam a, a innkem ah daidide in tou in ittna a lamdang dan ngaitua vengveng hi.

SIEMNA ZIL AW…PILNA SAANG E

Kamlianlal, Co-ordinator
ZSP STUDY FORUM

I nam sung a ham-upa,khanglui thu-le-laa,pupa tawndan le ngaina dan thei ipu-le-pate un nichin phial in ahing mualliam san zung zung ta ua,a dam lai sun teng jong nitum kuan bang mai hita, i government Officer nei sun teng jong pension/retired gam ding uh hita,ahin ei khangtha te leitung pilna le siemna,nam itna leh kipumkhatna lungtang neithei din ilumgsim te uh sohkhau bang kiloh pat sawm nailou….Malam khankhua ding i gel a,tukhang a mi iphah joulou sang ua khangsawn a itu-ita ten mi aphah joulou di dan ka ngaisun a,mi simmaw a i um di dan ka ngaitua chieng in ka dip ako masa hi.

UZO,ZYO le ZSP in Golden Jubilee/ Silver Jubilee noptah le thupi tah in lawm jouta.What next??? Jubilee dah le khuang,gualnop leh lamkai toh bei mai ding idiei ma? I gualnop man (social gathering) dan te uh midang ten ahing phah jou lou ua,ei a tuh a nop asah joulou bang un,siemna le pilna zonna ah jong koima iki phah sah lou na din khangtha ten hanlung chiem pan ta vai. Ipu-ipa ten sahang- galhang ana man ua, koima nuoi ah ana um kha sih uhi. Tukhang a siemna pilna kidemna ah eite jong koi nuoi a um tuam di idiei ma?? Ipu-ipa te British sepai hangsan te mai ah jong ana pua lou ua,ei khangtha te khamthei,guithei,zu-le-sa chite bawl a pua gam ding ita di uai le..? Ki ngaisun tha kia vai..Ipu-ipa lun e…..ei jong lun hai e..
Israelte gammang a kum 40 vingveng avah mang bang un ei jong kum 50 vah manthai na Jubilee imang jouta ua,igual te(namdang te) saupi ana tung man ta uhi.Del lei ipha na diei..?...pha e..chitah na toh pan la lei ipha nalai ding uhi.Leitung a pilpen le hausa pen a ki gen minthang Kumpi Solomom nasan jong ABC,123 theisa le akhut a seki(25 paise) toisa a piang ana hilou hi.Malam Zouta khankhuo ding khualna toh pan la pou lei Abraham,Isak,Jocob leh Zoute Pasian in lochingna ahing pe na ding hi.Ipu-ipa satsa i zogam eiten ipilna le siemna zang a i zuun lou le koiman igam ‘itna’ toh hing zuun sahlou ding uhi. Igam leh nam zuunna din khangtha te “ Back to the Table” chih bawl tha kia va ui.

Class X passed te contractor ut,BA ajaw leh Singngat MLA ut chi lungsim utna(mindset) apat potkhiat ahun ta hi.Manipur government nuoi a sepna leitho sawm jong innsung kitom gam na ahi giap hi.Central Government sepna tampi advertise abol jing a,unau Meena te a di mai a ST reservation kibawl hituan lou hi.Zou Sangnaupang Pawlpi,Delhi Branch in ZSP STUDY FORUM-cum-LIBRARY 2007 apat ana ki pankhia a,Pasien lungsietna toh tutan agaa muthei din a um ta hi.Tulel in LOOK UPSC POLICY: BRIGHTER DAYS AHEAD chi pei pi in UPSC+Group ‘B’ exam teng a din class a paipi tou laitah ahi.Subject specialised na chiet kihil khawm in malam Zouta khankhuo ding khualna in class akinei jing hi.Innlam(Manipur),Shillong leh mun tuam tuam a um ten jong ZSP STUDY FORUM model juithei lei hoilou di ama? Sepna jong te adia phattuam na mai hilou in,kot liantah honsah hilou ding ima? Bang chih lai pou in ZSP STUDY FORUM in nu-le-pate,lawm le gualte leh hattuam lamkai te thumpi na aki poimoh jing hi.

Na innsung mai khualna hilou in,inam liangvai khualna in khangtha Sangnaupang ten laisim in pan la tha kia lei deihuai kasa hi.Private company a sem ten jong chitahna,gin umna leh dihtatna toh na sem in inam toisang sawm chiet va ui.Pasien muang kawm le thudih peipi in,nam itna toh laisim lei ibieh Pasien in asung a kigel teng theina ding lungsim ahing guan ding hi.