2008 First SMS ! " Na Vangpha Hi "....

Hausienmuan Munluo
“Kumtha melna mu a, hanmual lam gel lou a na um leh mi vangpha na hi, khovel ah kumchin in mi asang sang in mualliam a, a insung mi asang sang in kumtha ni in hanmual a koi e khat gel leh sun in kumtha vaidawn uhi, nang tua te sang in na vang pha zaw hi.” Chin Achan in 12:01pm di vel in hing SMS hi.

Adih hi ka hinkhua peisa 2007 kum ka gel chiang in ka thil bawl hoi leh ka vang phatna te gel leh mupha lou in ka vang siatna hasat ka thua nate bou ka lung ah hing lang paipai a mivangsia bang in ka ki koi a kei leh kei ka ki sugenthei mama hi. Hinanleh gari a accident a maivun a liamna ma pawn lang belbol mikhat ka mu in mihing lah a zong pa itt dia mivangpha kahi chin lung ka gel…

Na hinkhuo sung a galtai kichi bang e na thei kha nai lou a, suangkul na lut nai lou a jep a na um nai lou leh leitung a mihing 500 Million te sang in mivang pha zaw na hi. Na inn sung a daikaih a zan khova galvil dan a na um nai lou a na naupa leh na upa ahei zaip(pocket) a damdoi tang poimo lou na mu nai lou a, khamthei Nos.4 bang e chi mukha nai lou leh dugaw nai lou na hi leh khovel a mihing 200 mIllion te sang a mivangpha zaw na hi chin UNODC in na bil kawm ah hing gen hi. Na nu leh na pa, na u leh nau ten damlou na zia a Crocin a ne mun sim ua Doctor gen damdoi lei na a sum na sen tam sim leh zong kingai se nai sin mivang pha na hi, UNODC in damdoi khamthei tang ne tam bang in gen hi: Cannabis -marihuana, hashish mihing 162 million in neh a, ATS -amphetamine, methamphetamine, ecstasy, methcathinone mihing 35 million in ne in, opium, morphine, heroin, synthetic opiates, kichite million 16 in na uhi- tualeh midang 13 million in cocaine ne uhi. Na hinkhua a hasat na tampi tua kichi in lungkham kisa in na hindan hasa nasah ni in lungkham sim mivang pha na hi, na hinkhua damdoi tang leh khamthei ten ahing control khatai…? Midang million 200 te sang a na hin khua nuam zaw mama ahi.

Chizatna bei a, lungsim zauthong lou a bieh-in sung a na tou thei a pasian na biah thei nah lai leh leitung a mihing 3 Billion te sang a vang pha zaw na hi. Khovel ah pasian be ut tampi um nanleh ahinkhua zau na zia in bethei lou in chizadna ngen in dim mi te sang in nang na vang pha zaw nalai hi. Na tah sa tung a puan na sil leh na teeng a, phalbi dap nuai a genthei kisa in vot/dap sa nanle chinpuan sil ding na nei nalai a, nuamtah a na ihmut thei leh khovel a mihing 70% sang a hausa zaw nalai na hi, nang mi vang pha na hi.

Inn kuan damlai teng toh kumtha na mang khawm thei a, biah-inn a leengkhawm na bawl thei a Hospital lam lung gel na nei lou leh nang khovel sangtam tah te sang a vangpha zaw na hi, mitamtah ten nichin in Hospital ah sina maitua ua adamlai te zong lunggim in hospital mai ah lunggel neithei lou in a koi e khat buaipi in um uh nang tambang na tua lou leh kum 2007 a mivang pha mama na hi chi ki thei in, mihing in lung gel sang tah inei ua hinaleh pasian in thil atangtung sah a pasian programe tangtung na hi chin na koi e khat in ahing gen pia zouta.

Na kholaite ua Bomb paw ding zauna nei pum a lampi a na va nai lou a, hei lang e apat thautang hing leeng in na lu akha ding na zau nai lou leh khovel a mihing 80 million val te sang in na vang pha zaw chin UN world crime in hing gen hi. Khovel mite kithat tua sawm in nichin kisui ua, ei khovel mi hilou imah..? mi vang pha na hi zia ahi zaw hi. Ni chin bomb paw in mi si zing a khat vei lam a Pakistan a ningahni dated si nu Pi Benazir Bhutto zong vengtu tampi tah nei na leh si na in zau lou in bomb in asi ve leh, nag bang ding a tam bang a gim neitah a tha hi lou, Pi Bhutto in Pakistan ahing zot/lut kiani in ama deisah tu sangtam tah ten vaidawn na nei ua tuanah zong tha sawm ahi in bomb suh paw hi a mihing 140 val in sina atua na sim kha a nang in migam buaidan na chi thei leh amaute sang a mi vang pha zaw na hi. Kum teng in bomb a si leh thauvui thautang a si mihing 10 million ding velte sang a vang pha zaw na hi.

Na naunu pasal khat in abawl siat nai lou a zanvot nuai a apuante ama ut thu lou a sutsah a aum nai lou leh na inn kuan ua mi vang pha na hi uh Delhi khopi sung a kum 2007 in numei bawl siat na Rape na 581 um chin Delhi police ten gen uhi. Na inn a na gouman pha te gupia ana um lou a, na inn sung a na itt na in sung mikhat ahing kitha pia nai lou leh kipah in Delhi khopi sung a mi Lakhs bang zat te sang a vangpha zaw na hi, na khosung/vengsung a bangma lungphawng thei ding aum lou leh vangpha ihi uh Delhi khopi sung mai ah zong kum 2007 in criminal cases 53,244 um hi ei tua te sang in I vangpha zaw.

Na in vengpa ahei na in veng nu puansil leh khedap bu na eng zia a vangsia kisa a na hasiat leh kigel pha in khovel ah mihing puansil zou lou dim set in um a khedap lei zou lou a dim hi amaute dinna ah ding le chin bang na chi diai..? Na kap diai ahi lou leh na nu na maw sah na lai diai..? Na buai na te thei in hina leh na vangphat na zong thei in chin ka loi pan hing gen kha hi, tam dih mama va. 2007 in igam ah sina tua tam ding a, galzau a tai tam in neh dng nei lou a lung kham tam ding hi hinanleh nag tua na umna a pat a na inn sung mkite tua siat, galtai, si leh suangkul lut chi thute na za kha nai lou a um na hi leh mi vang pha na hi.

Tam 2008 a ka SMS mu masah pen hing thot tu Achan in bang tan lung gel anei a tam bang a ahing thot ade aw, Delhi a 24th December 2007 a ka loi hoi mama Kimi in lungkham zia a ahing na mualliam san nua a tua zong mahini kikhailum in ahing lung sgim sah dia nua a tam bang sms ka mu in January 2007 – December sung a kahing khua te aban ban in hing lang in aw mi vangpha kana hi petma ve chin ka chimo na teng bei phial in kipahna ka nei hi. Nang zong 2007 kum a na vangphat na teng geltha voi tam nungah nou Achan SMS adih dan na hing thei deu deu ding a khovel a mihing 70% te sang a vangpha zaw na hidan na hing thei ding hi, tua zou chiang in tam Achan SMS aphat tuamdan tam kalai gel apat na thei ta ding. Achan in SMS ahing thot in zaan khovot nuai a lung gim kisa a um himaleng ka mit a luanhite val sit set in ka umna leh inn lam a ka inkuante ka mitlha ah hing lang in kumtha mang lop nonlou pa mittui val pum in van a alsi leh tung solha entou in ka kam apat awsua hing pawt in Kumtha chibai…!hing chi khia a vangpha kahidan ka hing kithei khiat in kum 2007 ka ngaitha asua hi. Tam Achan SMS ka loipa kung a ka gen pia zou in ama bangma bawl lou hamlou a siptah a um pa hing kap khia in van tung lam en in Kimi. Kumtha chibai..chin hing kap khia hi.

.